ԵՄ արտաքին գործերի նախարարների խորհուրդը հինգշաբթի օրը որոշել է Իրանի առաջատար ռազմաքաղաքական կառույցը՝ Իսլամական հեղափոխության պահապանների կորպուսը (ԻՀՊԿ), ճանաչել որպես ահաբեկչական կազմակերպություն։
Այս որոշումը կայացվել է ի պատասխան Իրանի իշխանությունների կողմից հունվարի սկզբին երկրում տեղի ունեցած հազարավոր ցուցարարների սպանության։
«Բռնաճնշումները չպետք է անպատասխան մնան։ Ցանկացած ռեժիմ, որը սպանում է իր սեփական հազարավոր քաղաքացիների, իրեն ավելի է մոտեցնում կործանմանը», – X սոցիալական մեդիա հարթակում ասել է եվրոպական դիվանագիտության ղեկավար Կաջա Կալլասը։
Արտաքին գործերի նախարարների խորհուրդը պատժամիջոցներ է կիրառել Իրանի 19 քաղաքացիների և 12 կազմակերպությունների ու ընկերությունների նկատմամբ։ Տասնհինգ անհատ և վեց կազմակերպություն ավելացվել են ԵՄ պատժամիջոցների ցանկում՝ բողոքի ցույցերը ճնշելուն մեղսակից լինելու համար, իսկ մնացածը՝ Ուկրաինայի հետ պատերազմում Ռուսաստանին օգնելու համար։
Բողոքի ցույցերը ճնշելու համար պատժամիջոցների ենթարկվածների թվում են Իրանի ներքին գործերի նախարար Էսկանդար Մոմենին և գլխավոր դատախազ Մոհամմադ Մոհավեդի-Ազադը, ինչպես նաև Իսլամական հեղափոխության պահապանների կորպուսի և ոստիկանության բարձրաստիճան սպաները։
Եվրամիությունը հայտնում է, որ իր իրանական պատժամիջոցների ցանկում այժմ ներառված են 247 անհատներ և 50 կազմակերպություններ։
Այս որոշումների մասին հայտարարելով՝ Ֆրանսիայի արտաքին գործերի նախարար Ժան-Նոել Բարոն հիշեցրել է, որ պատժամիջոցների ենթարկվածներին արգելվում է մուտք գործել ԵՄ երկրներ, և նրանց ակտիվները ԵՄ-ում, եթե այդպիսիք կան, կսառեցվեն։
Սկզբնաղբյուրը՝ BBC լրատվական կայք