Տահո լճում ձնահոսքի հետևանքով ինը դահուկորդ անհետ կորել է։ Ավելի ուշ նահանգային ոստիկանությունը հայտարարել է, որ նրանցից ութի մարմիններն են հայտնաբերվել։ Խմբի անդամներից մեկի մարմինը դեռևս չի հայտնաբերվել, սակայն ոստիկանությունը նրան մահացած է համարել։
Ձնահոսքի մասին հաղորդվել է երեքշաբթի օրը՝ Խաղաղ օվկիանոսի ժամանակով ժամը 11:30-ի սահմաններում (GMT), Թրաքիի մոտակայքում գտնվող Քասլ Փիք տարածքում։
Կալիֆոռնիայում գործող Blackbird Mountain Guides լեռնադահուկային տուրօպերատորը հայտնել է, որ 11 դահուկորդներից և չորս ուղեկցորդներից բաղկացած խումբը փետրվարի 15-ից ի վեր մնացել է Ֆրոգ լճի խրճիթներում։
«Դեպքը տեղի է ունեցել, երբ խումբն ավարտում էր եռօրյա երթուղին և վերադառնում էր իր մեկնարկային կետ»,-ասվում է ընկերության հայտարարության մեջ։
Այդ պահին տարածքում ուժի մեջ էին ձնահոսքի մասին նախազգուշացումները։
Նևադա շրջանի շերիֆի գրասենյակի տվյալներով՝ երեքշաբթի օրը ձնահոսքի գոտում մնացած 11 մարդկանցից վեցը փրկվել են։ Նրանցից երկուսը տեղափոխվել են հիվանդանոց, սակայն նրանց վնասվածքները կյանքին վտանգ չեն սպառնում։
Սկզբնաղբյուրը՝ BBC լրատվական կայք