Չնայած գործող հրադադարի ռեժիմին՝ Լիբանանի հարավում իսրայելական հարձակումները շարունակվել են նաև գիշերվա և վաղ առավոտյան ժամերին։ Այս մասին հայտնում է Լիբանանի պետական լրատվական գործակալությունը (NNA)։
Գործակալության տվյալներով՝ Հարավային Լիբանանի մի շարք բնակավայրերին հասցված մի շարք հարվածների հետևանքով կան զոհեր և վիրավորներ։
Հաղորդվում է, որ Արաբ Սալիմ գյուղում իրականացված երկփուլանի հարձակման հետևանքով երեք մարդ է զոհվել։ Եվս մեկ մարդ զոհվել է Դեյր էզ Զահրանիի քաղաքապետարանի ուղղությամբ իրականացված հարձակման ժամանակ։ Առանձնակի նշվում է Դուվայր գյուղի արևելյան մուտքի մոտ մոտոցիկլետին անօդաչու թռչող սարքով հարվածելու հետևանքով զոհված մեկ մարդու մասին։
Հաղորդվում է նաև Ան Նումայրիա գյուղին հասցված ավիահարվածի մասին, որի հետևանքով մի քանի բնակելի տներ են ավերվել։ Ըստ NNA-ի՝ իսրայելական ավիացիան հարվածներ է հասցրել նաև Կաֆր Գուզ բնակավայրին՝ ոչնչացնելով մի բնակելի շենք, իսկ կես ժամ չանցած՝ ևս մեկ շինություն։
Հավելյալ ավիահարվածներ են հասցվել նաև Կֆար Ռիման, Նաբատիա ալ Ֆաուկա, Շուկին, Հաբբուշ, Զիբդին, Սաջդ և Մահմուդիա շրջաններին ու գյուղերին։
Առանձին հաղորդվում է, որ իսրայելական անօդաչուն հարված է հասցրել Նաբատիա քաղաքի Ռահբատե թաղամասին և դրա շրջակայքին։
Ավերածությունների չափերի և հնարավոր այլ զոհերի մասին տեղեկությունները ճշտվում են։
Սկզբնաղբյուրը՝ News.am լրատվական կայք