Սպիտակ տունը պաշտոնական հրավեր է հղել Լիբանանի նախագահ Ժոզեֆ Աունին՝ հուլիսի 21-ին Վաշինգտոն այցելելու և ԱՄՆ նախագահ Դոնալդ Թրամփի հետ հանդիպելու վերաբերյալ։ «Արմենպրես»-ի փոխանցմամբ՝ այս մասին հայտնել է Վաշինգտոնում Լիբանանի դեսպանատունը։
Դիվանագիտական ներկայացուցչության տեղեկացմամբ՝ «հրավերն արտացոլում է Լիբանանի և Միացյալ Նահանգների միջև երկարատև գործընկերությունը և հնարավորություն է տալիս երկու առաջնորդներին քննարկել փոխադարձ հետաքրքրություն ներկայացնող հարցեր, այդ թվում՝ երկկողմ հարաբերությունները, տարածաշրջանային անվտանգությունը և ԱՄՆ-ի շարունակական աջակցությունը Լիբանանի ինքնիշխանությանը, կայունությանը, տարածքային ամբողջականությանը և պետական ինստիտուտներին»։