Պատկերացրեք՝ մտնում եք համերգասրահ, նստում ձեր տեղում, և… լույսերն ամբողջությամբ անջատվում են։ Ոչ բեմ, ոչ էկրան, ոչ լուսային շոու։ Միայն երաժշտություն, ձայներ և ձեր մյուս զգայարանները։
Հենց այսպիսի անսովոր փորձառություն է սպասվում օգոստոսի 26-ին՝ Հայաստանում առաջին անգամ կայանալիք «Համերգ տոտալ մթության մեջ» միջոցառման ժամանակ։
Նախաձեռնությունն անցկացվում է «ՖՐԵՍԿՈ» 13-րդ միջազգային փառատոնի շրջանակում՝ «Երեխաների հատուկ ստեղծագործական կենտրոն» ՊՈԱԿ-ի կողմից՝ ՀՀ կրթության, գիտության, մշակույթի և սպորտի նախարարության աջակցությամբ։
Հանդիսատեսին լիակատար մթության պայմաններում ուղեկցելու են տեսողության խանգարում ունեցող անձինք։ Այսինքն՝ այս անգամ հենց նրանք են լինելու ձեր վստահելի ուղեկիցները, իսկ դուք՝ նրանք, ովքեր պետք է սովորեք կողմնորոշվել առանց տեսողության օգնության։
Նախագծի գաղափարն էլ հենց սա է՝ մի քանի ժամով փոխել սովորական իրավիճակը և սեփական փորձով զգալ, թե որքան կարևոր են մատչելի միջավայրը, ճիշտ հարմարեցումները և այլ զգայարանների միջոցով կողմնորոշվելու կարողությունը։
«Ներառականությունը «ՖՐԵՍԿՈ» փառատոնի կարևոր առաքելություններից է, իսկ այս նախագիծը հնարավորություն է տալիս այդ գաղափարը վերածել անմիջական փորձառության։ Լիակատար մթության մեջ հայտնվելով՝ հանդիսատեսը կարող է ավելի լավ զգալ շրջակա միջավայրի մատչելիության և հարմարեցումների կարևորությունը»,- նշում է փառատոնի գեղարվեստական ղեկավար Աննա Կարապետյանը։
Դուք չեք տեսնելու կատարողներին և մինչև միջոցառման ավարտը չեք իմանալու, թե ովքեր են ելույթ ունենում։ Նրանց ինքնությունը կբացահայտվի միայն այն ժամանակ, երբ լույսերը կրկին վառվեն։
Այսպիսով, երաժիշտների արտաքին տեսքը, բեմական լուսավորությունը, էկրաններն ու մյուս տեսողական ազդակները պարզապես «անհետանում» են։ Մնում է միայն երաժշտությունը՝ իր ձայնով, ռիթմով ու տրամադրությամբ։
Համերգը տեղի կունենա օգոստոսի 26-ին՝ ժամը 19:00-ին, Ճարտարապետների միության դահլիճում։ Մուտքն ազատ է։