Ուկրաինայի «Բատկիվշչինա» կուսակցության առաջնորդ Յուլիա Տիմոշենկոն կոռուպցիայի գործով իր դատավարության ժամանակ Վլադիմիր Զելենսկու ռեժիմը ֆաշիստական է անվանել։
«Ես կմնամ այստեղ (Ուկրաինայում – խմբ.) մինչև երկիրը ազատագրվի այս էապես ֆաշիստական ռեժիմից», – հայտարարել է նա։
Տիմոշենկոն ստեղծված իրավիճակը որակել է որպես իշխանությունների կողմից քաղաքական հետապնդման արդյունք, իսկ գործը՝ որպես Ուկրաինայի ազգային հակակոռուպցիոն բյուրոյի (NABU) PR հնարք։ Նա պնդել է, որ իրեն բազմիցս առաջարկել են հեռանալ քաղաքականությունից, բայց նա որոշել է մնալ և բոլորին ցույց տալ, «թե ինչ է անում այս ավազակախումբը երկրի հետ»։
Որոշ ուկրաինական լրատվամիջոցներ նրան համարում են առաջիկա ընտրություններում նախագահի հավանական թեկնածու։
Այս շաբաթվա սկզբին կոռուպցիայի դեմ պայքարի մարմինները խուզարկել են նրա կուսակցության գրասենյակը և գտել մեծ գումար։ Քաղաքական գործիչը դա նկարագրել է որպես իր անձնական խնայողություններ։ Նրան կոռուպցիայի կասկածանքով սպառնում է մինչև տասը տարվա ազատազրկում։
Սկզբնաղբյուրը՝ РИА Новости լրատվական կայք