Հունիսի 6-ին արտակարգ դեպք է տեղի ունեցել Արարատի մարզում։ Ժամը 12:50-ի սահմաններում «Վեդի» բժշկական կենտրոնից ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Վեդիի բաժին ահազանգ է ստացվել, որ «կրծքավանդակի առաջնային պատի օտար մարմին» վնասվածքով իրենց մոտ է տեղափոխվել մի երեխա։
Shamshyan.com-ի հաղորդմամբ, երեխան տեղափոխվել է Երևանի «Սուրբ Աստվածամայր» բժշկական կենտրոն։ ԲԿ-ի աշխատակիցները պայքարել են երեխայի կյանքի համար, ինչը նրանց հաջողվել է։
Պարզվել է, որ երեխան իրենց մոտ է տեղափոխվել «կրծքավանդակի ծակած վերք» ախտորոշմամբ։ Վեդու ոստիկանները պարզել են, որ նա Արարատի մարզի բնակիչ 14-ամյա Սիսակ Ա.-ն է։ Նա հունիսի 6-ին՝ ժամը 12:30-ի սահմաններում տան բակում իրենց պատկանող օդաճնշիչ հրացանով ծառին է կրակել, գնդակը հետադարձ է կատարել ու դիպչել Սիսակ Ա.-ի կրծքավանդակին։
Դեպքի փաստով ոստիկանության Վեդիի բաժնում փաստաթղթեր են կազմվել, որոնք փոխանցվել են ՀՀ Քննչական կոմիտեի Արարատի մարզային քննչական վարչության Վեդիի քննչական բաժին։
ՆԳ նախարարությունից, ի պատասխան մամուլում տարածվող տեղեկություններին, թե երեխան հիվանդանոց է տեղափոխվել հրազենային վնասվածքով, «Հայկական ժամանակ»-ի հետ զրույցում հայտնեցին, որ դրանք չեն համախատասխանում իրականությանը։
Սկզբնաղբյուրը՝ Armtimes լրատվական կայք