Թուրքիան պլանավորում է 9 տարի առաջ Մոսկվայից ձեռք բերված ռուսական S-400 հակաօդային պաշտպանության հրթիռային համակարգեր (ՀՕՊ) վաճառել Պարսից ծոցի երկրներից մեկին,- հաղորդում է Hürriyet թերթը՝ հղում անելով սեփական տեղեկատվությանը։
Որոշ աղբյուրների համաձայն՝ ռուսական ՀՕՊ համակարգերի գնորդը կլինի Միացյալ Արաբական Էմիրությունները, այլ աղբյուրների համաձայն՝ Կատարը։
Ըստ թերթի՝ գործարքի մասին հայտարարվելու է հուլիսի 10-ին։ Նախորդ օրը կողմերը «լուծում էին վերջնական տարաձայնությունները», հաղորդում է Hürriyet-ը։
Այնուամենայնիվ, S-400-ների վաճառքը պահանջում է Մոսկվայի հաստատումը, ինչպես նախատեսված էր Անկարայի՝ համակարգերի գնման ժամանակ կնքած համաձայնագրով։
Թուրքիան 2017 թվականին Ռուսաստանից գնել է S-400 ՀՕՊ համակարգեր՝ կնքելով 2.5 միլիարդ դոլարի պայմանագիր։ Արդյունքում ԱՄՆ-ն պատժամիջոցներ է կիրառել և հրաժարվել Թուրքիային մատակարարել F-35 կործանիչների համար նախատեսված սարքավորումներ, ինչպես նաև կասեցրել Անկարայի մասնակցությունը ինքնաթիռների արտադրության ծրագրին։
Վերջին տարիներին Թուրքիան ձգտում էր վերադարձնել S-400 համակարգերը։
Այս հարցը քննարկվել է Թուրքիայի նախագահ Ռեջեփ Թայիփ Էրդողանի և Վլադիմիր Պուտինի միջև 2025 թվականի դեկտեմբերին Թուրքմենստանում կայացած հանդիպման ժամանակ։ Թուրքիան ԱՄՆ-ի հետ քննարկել է տարբեր տարբերակներ՝ համակարգերը պահեստներում պահել, մեկնարկային մեխանիզմների ապամոնտաժում և այնուհետև համատեղ օբյեկտում տեղադրում, կամ համակարգերը ստուգելի ոչ մարտական կարգավիճակի վերածել։
Սկզբնաղբյուրը՝ Armtimes լրատվական կայք