Գերմանիայի կանցլեր Ֆրիդրիխ Մերցը մտադիր է պաշտոնից ազատել տրանսպորտի նախարար Պատրիկ Շնիդերին (ՔԴՄ),- հայտնել է Bild-ը՝ հղում կատարելով իշխող կոալիցիայի աղբյուրներին։
Որպես որոշման պատճառ` նշվում է կանցլերի դժգոհությունը նախարարության աշխատանքից՝ երկրի երկաթուղային ցանցի և տրանսպորտային ենթակառուցվածքի խնդիրների ֆոնին։ Պարբերականի տվյալներով՝ չնայած գերատեսչության ռեկորդային բյուջեին, ենթակառուցվածքի արդիականացման և Deutsche Bahn-ի աշխատանքի բարելավման հարցում զգալի առաջընթացի հասնել չի հաջողվել։
Աղբյուրները նշել են, որ Մերցը տրանսպորտային ոլորտի ճգնաժամը համարում է քաղաքական խնդիր, քանի որ քաղաքացիները ճանապարհների և երկաթուղիների վիճակն ընկալում են որպես իր գործառույթներն արդյունավետ իրականացնելու պետության անկարողություն։
Գերմանիայի կառավարության կազմում վերադասավորումները շարունակվում են. ավելի վաղ հաղորդվել էր Դաշնային կանցլերի գրասենյակի և Գերմանիայի առողջապահության նախարարության ղեկավարության հնարավոր փոփոխության մասին։
Սկզբնաղբյուրը՝ News.am լրատվական կայք