Զինվորական դատարանը Հայաստանում ծնված, Ռուսաստանի և Հայաստանի քաղաքացիություն ունեցող 23-ամյա Գևորգ Գրիգորյանին դատապարտել է 9,5 ազատազրկման ընդհանուր ռեժիմի ուղղիչ գաղութում։
Երիտասարդի նկատմամբ քրեական գործ է հարուցվել համացանցում նրա գրած մեկնաբանությունների պատճառով, հայտնում է «Медиазона»-ն:
Գրիգորյանը մեղավոր է ճանաչվել ռազմական «ֆեյքեր» տարածելու, նացիզմն արդարացնելու, ինչպես նաև ահաբեկչության և ծայրահեղականության կոչեր անելու մեղադրանքներով։
Նշվում է, որ երիտասարդին ձերբակալել են 2025 թվականի հունիսին, որից հետո նրա նկատմամբ տնային կալանք է կիրառվել։
Քրեական հետապնդման առիթ են դարձել հայկական առցանց հարթակներում արված մեկնաբանությունները, որոնցում Գրիգորյանը մասնավորապես գրել է, թե «Հիտլերը պետք է նրանց բոլորին ոչնչացներ», և որ Ուկրաինայից հետո ռուսական զորքերը կարող են մտնել Հայաստան։
Գրիգորյանի ծանոթը պատմել է, որ նա նման մեկնաբանություններ է թողել՝ վրդովված լինելով այն հանգամանքից, որ 2023 թվականին՝ Ղարաբաղի պատերազմի ժամանակ, Ռուսաստանը Հայաստանին օգնություն չի ցուցաբերել։
Ռուսաստանի քննչական կոմիտեն ձերբակալությունից հետո պնդել է, որ Գրիգորյանը վիրավորական ձևակերպումներով մեկնաբանություններ է հրապարակել և բացահայտ աջակցել նացիստական գաղափարախոսությանը։
Սկզբում երիտասարդին մեղադրանք է առաջադրվել նացիզմն արդարացնելու և ատելություն հրահրելու համար, ավելի ուշ մեղադրանքների շրջանակն ընդլայնվել է, և 2026 թվականի օգոստոսին գործի նյութերը փոխանցվել են զինվորական դատարան։
Պետական մեղադրողը նրա համար պահանջել է տասը տարվա ազատազրկում։ Նշվում է, որ Գրիգորյանն ընդունել է մեղքը և զղջացել։